काठमाडौं । अमेरिकी सर्वोच्च अदालतले राष्ट्रपति डोनाल्ड ट्रम्पले लगाएका ट्यारिफ (भन्सारशुल्क) खारेज गरेको छ । अदातलले ट्यारिक अवैध रहेको ठहर गर्दै खारेज गरेको हो । यो आदेशपछि ट्रम्पले अदालतको फैसलालाई लाजमर्दो भएको बताएका छन् ।
असन्तुष्ट ट्रम्पले आफूले कसैसँग ट्यारिफ लिन नसक्ने भए पनि जुनसुकै देशसँगको व्यापार पूर्ण रूपमा बन्द गर्न सक्ने र उक्त देशको अर्थतन्त्र बर्बाद पार्न सक्ने धम्की दिएका छन् ।
अन्य विकल्प प्रयोग गर्ने दाबी
अदालतको फैसलापछि ट्रम्पले अदालतले गलत तरिकारले खारेज गरेको बताउँदै अन्य विकल्प प्रयोग गरिने बताएका छन् ।
उनले भनेका छन्, “हामीसँग धेरै विकल्प छन् । यसको अर्थ हामी अझ धेरै आम्दानी गर्नेछौँ । र, यसले हामीलाई अझ बलियो बनाउनेछ ।”
अदालतले आफूलाई एक डलर पनि शुल्क लगाउने अनुमति नदिएको गुनासो गर्दै ट्रम्पले भनेका छन्, “म एक डलर पनि लिन सक्दिनँ । यो फैसला पक्कै पनि ती अन्य देशहरूको सुरक्षाका लागि लिइएको हुनुपर्छ, न कि अमेरिकाका लागि ।”
उनले आफूलाई ती देशहरूसँगको कुनै पनि प्रकारको व्यापार वा कारोबार पूर्ण रूपमा बन्द गर्ने अधिकार रहेको दाबी गरे ।
अदालतद्वारा ट्यारिफ खारेज गर्ने फैसला आएको केही घण्टाभित्रै ट्रम्पले विश्वभरका देशहरूमा १० प्रतिशत ‘वैश्विक ट्यारिफ’ लगाउने घोषणा गरेका छन् ।
ट्रम्पले धारा १२२ अन्तर्गत प्राप्त शक्तिहरूको प्रयोग गर्दै वैश्विक १० प्रतिशत ट्यारिफ लगाएका हुन् ।
अमेरिकी कानुनअनुसार अमेरिकी राष्ट्रपतिले १५० दिनसम्म १५ प्रतिशतसम्म ट्यारिफ लगाउन सक्छन् । यही प्रावधान टेकेर ट्रम्पले १५० दिनका लागि १० प्रतिशत वैश्विक ट्यारिफ लगाएका हुन् । १५० दिनपछि अमेरिकी संसद्मा प्रस्ताव ल्याएर यसलाई निरन्तरता दिने वा नदिने भन्नेबारे निर्णय गरिनेछ । १२ खरी बाट
