बुधबार १६.४९ अंकले बढ्यो नेप्से परिसूचक, १ अर्ब ८७ करोडमाथिको कारोबार

सेयर बजार लगातार सातौं कार्य दिनमा पनि बढेको छ । बुधबार पनि सकारात्मक नै भएर बन्द भएपछि बजार बढेको लगातार ७ दिन पूरा भएको हो । यस दिन नेप्से सूचक १६.४९ अंकले बढेर १९५९.१२ विन्दुमा आएको छ । २ कम्पनीमा सकारात्मक सर्किट लाग्दा करिब १ अर्ब ८७ करोड रुपैयाँको सेयर कारोबार भएको छ ।

यसअघि लगातारजसो घटेको बजार केही दिनयता भने सकारात्मक गतिमा अघि बढ्दैछ । बुधबार इन्ट्रा डे मा सूचक बारम्बार हरियो र रातो भइरहे पनि क्रेताहरु नै हावी भएपछि अन्ततः नेप्से हरियो नै बनेर बन्द भएको हो ।

समग्रमा बजार सकारात्मक बाटामै रहेको छ । दीर्घकालीन लगानीकर्ताहरुले पर्खिने भए पनि ट्रेडरहरुले भने अलिकति नाफा हुने बित्तिकै बेच्ने गर्छन् । यसकारण बजार बेलाबेलामा करेक्सन पनि हुने गर्छ, जुन स्वभाविक पनि हो ।

कारोबारीले निश्चित प्रतिशत मुनाफा हुनासाथ बेच्ने भए पनि दीर्घकालीन लगानीकर्ताले भने पुँजीगत लाभसहित लाभांशमा जोड दिएका हुन्छन् । उनीहरु छिटोछिटो कारोबार गर्दैनन् । सामान्यतयः २ देखि ५ वर्षसम्मको रणनीति उनीहरुले बनाउने गरेको देखिन्छ ।

 विशेषगरी, ब्याजदर घट्न थालेपछि त्यसको सकारात्मक प्रभाव सेयर बजारमा देखिएको हो । यस्तै, सेयर भाउ निकै तल्लो विन्दुमा आएको छ । भाउ धेरै सस्तो भएकाले पनि अल्पकालीन र दीर्घकालीन दुवैथरिका लगानीकर्ता आकर्षित भएको अनुमान गरिएको छ ।